Një grup tjetër i afganëve do të arrijnë sot në Kosovë,

Kështu ka bërë të ditur Ministri i Brendshëm, Xhelal Sveçla, derisa nuk e ka specifikuar numrin e saktë të personave që do të pranojë Kosova.

Sipas tij, afganët e ardhur do të jenë përkohësisht në Kosovë, dhe më pas do të udhëtojnë në destinacionet finale, pa treguar nëse do të jenë Shtetet e Bashkuara të Amerikës vendi ku pritet të udhëtojnë pas qëndrimit në Kosovë.

“Është çështje e organizimit të aleatëve tanë sa i takon nisjes së aeroplanëve të tyre për në Kosovë. Numri nuk është përcaktuar saktë”, deklaroi Sveçla para gazetarëve, të dielën.

Një ditë më parë Kosova strehoi 111 afganë. Ata u pritën në Aeroportin Ndëkombëtar të Prishtinës “Adem Jashari” nga presidentja, Vjosa Osmani, kryeministri, Albin Kurti, ministri Sveçla dhe ambasadori i ShBA në Kosovë, Philip Kosnett./arbresh.info/